La Associazion F-VG Pride ODV, cul jutori e la colaborazion di cetantis realtâts dal teritori
regjonâl, e proclame cun chest manifest il sest Pride dal Friûl-Vignesie Julie, che al rivarà
insom cu le marcje finâl a Udin ai 3 di Otubar dal 2026.
Il manifest politic che al compagne la manifestazion al è il risultât di un percors corâl di
scolte e partecipazion: la Associazion F-VG Pride e à, cun di fat, sielzût di rinovâ il so
document programatic traviers di une schirie di assembleis publichis fatis sul teritori. Al è
ta chest proces democratic e dal bas che la comunitât LGBTQIAPK+ dal Friûl-Vignesie
Julie e à cjatât vôs, definint un test che al vûl jessi il spieli atuâl e radicâl des nestris bataiis
di ogni dì.
Tornâ a Udin, dopo nûf agns dal prin e storic Pride regjonâl dal 2017, par noaltris nol è
dome un esercizi di memorie, ma un at di riapropriazion politiche e afetive: tornìn te citât
che nus à viodûts/udis nassi e dulà che pe prime volte o vin misurât la nestre fuarce
coletive in cheste regjon, par tornâ a dî che, cun dut dal clime di restaurazion che o
respirìn, lis nestris lidriis a son profondis e la nestre vôs no si è flapide.
Il nestri sproc plurilengâl “Affrontando il clima ostile” – Brut timp, ma cumbinin! – Soočanje
s sovražno klimo – nol è dome une constatazion des inclemencis climatichis, ma une
declarazion di resistence: vivi lis intemperiis de storie cu le schene drete, oponint ae
violence de repression la cure dai nestris cuarps . La sielte de date dai 3 di Otubar e je, ta
chest sens, la nestre prime rivendicazion politiche. Intune ete segnade de emergjence
climatiche, che no je plui une menace future maben une realtât violente dal presint,
manifestâ ai prins di Otubar, rinunziant ae curnîs estive dal Pride Month, al è un at di cure
coletive e radicâl: o refudìn di esponi i cuarps de nestre comunitât a temperaduris che, tai
ultins agns, no son dome dâts statistics, ma barieris architetonichis naturâls che a blochin
la partecipazion di personis vieris o disabilis, e di dutis lis subietivitâts plui fragjilis. O
refudìn la logjiche de performance a cualsisei cost e o sielzìn di tignî cont de acessibilitât
dai nestris spazis, savint che no je la estetiche stagjonâl a jemplâ lis placis, ma la fuarce di
un manifest politic che al met la cure di ducj/tis tal prin puest.
Il “clime” dulà che o stin al è chel di un mont da pît dal precipizi, dulà che la vuere globâl e
la repression de dissidence si nudrissin une cun chê altre intune spirâl mai viodude prime.
Intant che, a nivel internazionâl, la progression militâr jenfri Stâts Unîts, Israêl e Iran a
impie l’Asie Ocidentâl, colpint uficis politics e infrastruturis civîls e rivant fintremai a
menaçâ un bloc energjetic mondiâl, o viodìn cun orôr la normalizazion de muart tant che
strument diplomatic e il consolidâsi di regjims che a doprin i cuarps des feminis e des
personis queer tant che cjamps di bataie ideologjics. Ta chest senari di distruzion, o
denunzìn cun fuarce l’ûs strumentâl des nestris esistencis: il pink e queerwashing di Israêl,
che al svintule bandieris cul arc di sant Marc jenfri i rudinaçs di Gaza e in Liban, a son i
tentatîfs cinics di legjitimâ la opression coloniâl par tramit di une aparente superioritât tai
dirits. Nol è pussibil nissui orgoi sot dai bombardaments, e no esist une liberazion queer
che e puedi escludi la liberazion dai popui e la fin di ogni apartheid.
Cheste pulsion beliche si spiele in mût speculâr ancje tes politichis internis, dulà che il
control dai confins e il cussì clamât “ordin public” a deventin dai pretescj par erodi lis
libertâts fondamentâls. Un esempli ignobil al è il Decret Sigurece, che al introdûs i fêrs
preventîfs e la vigjilance discrezionâl, fasint deventâ bersai de polizie cualsisei persone
che e proteste. Al è un atac diret ae democrazie che si ingrope a une crosade ideologjiche
globâl cuintri des nestris esistencis: de rimozion dai simbui di Stonewall ae scancelazion
des peraulis “transgender” e “non binary” dai database sientifics dai Stâts Unîts, cence

dismenteâ i tentatîfs, ducj europeans, di blindâ il concet di famee par vie referendarie o di
difindi pratichis di conversion violentis tal non di une libertât di espression straviade.
Se in Ongjarie la dissidence antifassiste e lis identitâts no binariis a finissin in cjadenis,
come tal câs de nestre compagne Maja T., noaltris o rispuindìn rivendicant la nestre
invisibilitât e la trasformìn in fuarce.
Ancje te nestre regjon, la Zonte Fedriga e continue a distinguisi par une ostilitât cidine ma
pervasive: dal refût persistent di patrocinâ lis nestris iniziativis, consideradis “divisivis”, ae
mancjance di fonts pe nestre ativitât di prevenzion dal bulisim omolesbobiatransfobic, lis
istituzions regjonâls a someìn volê ignorâ che te citadinance o sin ancje nô.
In chest panorame di discriminazion, odi e restrizions des libertâts, la associazion F-VG
Pride ODV e sint il dovê di radicalizâ la sô analisi intersezionâl: o tornìn a dî che il pandisi
di chestis derivis autoritaris, razistis e omolesbobiatransfobichis nol è un erôr dal sisteme,
ma la prove de “buine riessude” di un capitalisim di fin imperi che al sorevîf dividint i
subalternis e fasint une jerarchie des margjinalitâts. Par sô definizion, il capitalisim si fonde
su la acumulazion e su la espropriazion de ricjece; il sfrutament dal capitâl uman e naturâl
al è il teren dulà che l’odi pes minorancis al pues vignî sù ben.
Sfuarçâ i cuarps dentri di costruts sociâi tes categoriis dal “naturâl desiderabil” e dal
“diferent mostruôs” al covente dome a mantignî il control e a garantî che l’1% plui siôr al
tegni par sè metât de ricjece mondiâl, intant che il rest da la popolazion al lote par sorevivi.
Par chest la intersezionalitât e l’anticapitalisim a son i nestris valôrs di fonde: o adotìn cun
braure l’acronim LGBTQIAPK+, cjapant dentri lis subietivitâts poliamorosis e lis comunitât
kink/BDSM, parcè che ogni desideri puartât vie ae norme al è un at di sabotaç dal sisteme
e parcè che o volìn che dutis lis letaris a sedin un spazi di visibilitât e une rivendicazion di
dignitât cuintri di dutis lis formis di stigme.
O tornìn a Udin par trasformâ la nestre preocupazion in azion coletive. Denant di une
politiche internazionâl, statâl e regjonâl che e ignore in mût sistematic lis nestris istancis,
noaltris o rispuindìn cu la presince fisiche dai nestris cuarps no conformis. O pretindìn dai
cambiaments struturâi: scuelis libaris di prejudizis, sanitât che no patologjizi lis identitâts
trans*, tutele par dutis lis fameis e la fin dal sfrutament dai cuarps e dai teritoris. O nin in
place parcè che o sin une comunitât che no mole di rivendicâ la sô bielece prismatiche e
la sô rabie, savint che dal lancûr e de ariditât dulà che a volin tignînus o fasarìn nassi lis
nestris rosis plui bielis.
Par un mont ecui, antifassist, decoloniâl e simpri plui braurosementri queer, F-VG Pride al
domande:
Cumò e ancjemò rabie trans*
Ricognossi e tutelâ la autodeterminazion, scombati lis discriminazions e garantî i dirits aes
subietivitâts plui margjinalizadis al è fondamentâl par vê une societât plui juste.
O domandìn il plen ricognossiment de autodeterminazion des personis trans*, svincolant
la retifiche anagrafiche dal judizi tes aulis di tribunâl. O refudìn la idee che la identitât di
une persone e scugnî jessi ogjet di un procès o de aprovazion di un judiç par jessi
legjitimade: o domandìn che la retifiche a sedi un at poiât su la autodeterminazion e sul
vivût de persone. O pretindìn che i documents di identitât a vegnin inzornâts par rifleti il

gjenar invezit dal ses, introdusint une tierce opzion no binarie, in maniere di fermâ la
violazion de privacy che il sisteme di cumò al continue a impon.
Denunzìn la mancjance di struturis publichis adatis e o domandìn che a vegnin cuvierts i
coscj dai percors di afermazion, in plui di chei pe formazion specifiche dal personâl
sanitari. Ogni Ent Public, ancje lis universitâts, al vares di garantî la identitât alias pal
propri personâl e pai students/is cun proceduris semplicis e acessibilis, cence oblic di
diagnosi o di certificazions medichis, par che il non di elezion al sedi imediât e no
patologjizant.
Il plen ricognossiment de identitât si misure ancje tal acès ai dirits civîi: la abolizion des filis
separadis par gjenar ai seçs eletorâi e je stade une concuiste impuartante cuintri dai
coming out sfuarçâts. Cun dut achel, al reste necessari garantî che ogni persone e puedi
esercitâ il dirit di vôt cun documents coerents cu la proprie identitât, superant lis barieris
burocratichis di cumò.
Tal ultin, a dispiet de rimozion dal “transgenderisim” de liste des malatiis mentâls (ICD-11),
tancj professioniscj de salût no àn ancjemò bandonât metodis patologjizants. O pretindìn
un cambiament radicâl tes pratichis di cure, daûr dal esempli de Organizazion Mondiâl de
Sanitât: al è rivât il timp di adotâ un model afermatîf bon di valorizâ la autodeterminazion
libare e cussiente, cence che lis sieltis personâl a sedin influençadis di autorizazions o
periziis dal di fûr.
Fevelâ di ducj/tis, fevelâ a dutis/cj
Il rispiet e la inclusion des identitâts si mostre ancje tal lengaç, imprest potent par
contrastâ patriarcjât, disavualancis e discriminazions. O domandìn che lis istituzions a
adotin un lengaç plui ampli tai documents e tes comunicazions uficiâls.
Al è necessari sburtâ par fâ dai percors di formazion tes scuelis, cun chê di doprâ une
comunicazion inclusive che e puedi prevignî formis di odi che si poin su divignince,
religjon, ses, gjenar, orientament sessuâl e cundizion di disabilitât.
In Friûl-Vignesie Julie, chest impegn si lee ancje ae tutele des pluralitâts linguistichis che
si cjatin tal nestri teritori: il bi-multilinguisim nol è dome un oblic normatîf, ma un principi
indispensabil, di prudelâ e protezi cuintri di cualsisei forme di intolerance viers lis lenghis
slovene, furlane e todescje.
Sui nestris cuarps e sedi fate la nestre volontât
O rivendichin il dirit ae plene autodeterminazion dai cuarps e a cundizions materiâls che a
garantissin la lôr dignitât, salût e libertât. O afermìn che la liberazion dai cuarps e passe
ancje dal superament dai standards estetics e dai costruts sociâi opressîfs che a produsin
esclusion e jerarchiis.
O rivendichìn pes personis grassis il dirit a une assistence sanitarie libare di prejudizis e a
oportunitâts lavorativis compagnis di chei altris, denunziant la grassofobie e
grassonegativitât tant che formis di opression intersezionâl, intiessudis cun dinamichis
razistis, classistis e abilistis. O refudìn modei corporâi imponûts, che a metin dongje la

magrece al valôr sociâl e a riprodusin une estetiche egjemoniche blancje e ocidentâl, e o
refudìn dutis lis formis di speculazion che a capitalizin su lis insigurecis.
O domandìn l’acès sore nuie ai dispositîfs igjienics mestruâi tai lûcs di istruzion e la
istituzion dal congjêt mestruâl come part di un impegn plui ampli pe justizie mestruâl. Al
covente investît inte formazion dal personâl sanitari e inte ricercje su lis cundizions
sanitaris dai cuarps mestruants, cussì come che si varès di prudelâ campagnis
informativis e percors educatîfs che a puedin judâ a de-stigmatizâ lis mestruazions.
Jù lis mans des nestris fameis
Ricognossin e rivendichin la plene dignitât de pluralitât des fameis, des relazions afetivis e
dai percors di gjenitorialitât, domandant il ricognossiment de nassite dai gjenitôrs intes
fameis omogjenitoriâls, il dirit ae plene adozion pai gjenitôrs intenzionâi e une riforme
complessive des adozions, che a sedin acessibilis a dutis lis personis al di là dal
orientament sessuâl, de identitât di gjenar o dal stât civîl.
Al è necessari superâ cualsisei distinzion juridiche jenfri lis cubiis e garantî la plene
trascrizion dai matrimonis jenfri personis dal stes gjenar celebrâts tal forest, riformant in
mût integrâl il Codiç Civîl par istituî il matrimoni egalitari e ricognossi ancje lis relazions
poliamorosis e lis no-monogamiis etichis.
Cun di plui, o domandìn politichis struturâls a supuart des fameis LGBTQIAPK+, servizis
educatîfs acessibii e congjêts parentâi egalitaris. O pretindìn che il personâl educatîf e
scolastic al vegni formât su lis fameis di dutis lis fatis, e che ducj i modei di fameis a
vegnin rapresentâts in maniere ecue.
O rivendichìn il dirit ae autodeterminazion intai percors riprodutîfs. O sin cuintri de
criminalizazion de gjestazion par altris e invezit o sin a pro di un acès che al sedi
regolamentât e rispietôs de dignitât di dutis lis parts. Dut intun timp, o domandìn che al
vegni garantît l’acès libar e regolamentât ae procreazion assistude par dutis lis personis.
Stufs/is di jessi pazients
O rivendichìn il dirit ae salût psicologjiche, emotive e mentâl tant che part impuartante dal
benstâ di ducj/tis, cence discriminazions. O pretindìn strategjiis sistemichis che a
garantissin un acès universâl ai servizis sociosanitaris, gratuit e no patologjizant, fondât
sul consens informât e su la depatologjizazion de identitât di gjenar.
O sticin la Regjon Friûl-Vignesie Julie a infuartî i reparts pes infezions trasmissibilis
sessualmentri (IST), individuant tal Centri MST di Gurize l’ent vuide par un coordenament
strategjic jenfri professioniscj e associazions dal teritori. O domandìn che la Regjon a
siguri la gratuitât e la difusion capilâr dai mieçs di protezion bariere e des profilassis
alternativis (PrEP e PEP), promovint campagnis di testing community-based (CBvCT)
indreçadis in maniere prioritarie ae popolazion plui esponude, cjapant dentri MSM,
personis che a doprìn sostancis par vie inietive (IDU), sex workers e personis migrantis.
Cun di plui, o pretindìn che la vacine HPV e sedi disponibile sore nuie par dute la
popolazion e che a vegnin rinfuarcidis lis politichis di riduzion dal dam, par superâ
cualsisei metodiche colpevolizante e par promovi la salût coletive.

Adun, denunzìn i ostacui a l’acès de interuzion volontarie di gravidance (IVG), domandant
la plene aplicazion da la Leç 194/78, l’aces plen e libar ae IVG farmacologjiche, il
potenziament dai consultoris, e la limitazion de obiezion di cussience. O domandìn la
presince di personâl formât e no judicant, libar di pressions di fûr, e une formazion
adeguade su lis tematichis LGBTQIAPK+, cun chê di tutelâ ad in plen i dirits riprodutîfs
ancje tai percors di afermazion di gjenar.
O domandìn che a vegnin proibîts par leç lis pratichis di chirurgjie “coretive” e ogni
intervent medic no vitâl su lis personis nassudis con VCS (Variazions des Carateristichis
Sessuâls), par tutelâ la integritât fisiche dai minôrs di binarisims arbitraris.
O pretindìn ancje che lis personis trans* e no-binary a puedin acedi a percors di
afermazion sore nuie e de-burocratizâts, in maniere di finîle cu lis violencis istituzionâls,
par garantî che lis terapiis ormonâls e chirurgjichis a sedin tratadis cu le stesse dignitât e
urgjence di cualsisei altri intervent sanitari. O pretindìn, alfin, che lis Aziendis Sanitaris a
istituissin une formazion obligatorie, intersezionâl e depatologjizant su cemût tratâ lis
pazientis LGBTQIAPK+, coordenade cun ordins professionâi e realtâts associativis, par
dislidrisâ ogni forme di prejudizi sistemic tai lûcs di cure. Cheste formazion e varès di
proviodi ancje percors di invecjament dignitôs, sigurant un acès a RSA e struturis di
assistence che al rispieti la identitât di gjenar e lis storiis personâls, in maniere di dâi
cuintri al isolament e ae invisibilizazion des personis vieris te nestre comunitât.
Ce gjenar di scuele?
O denunzìn cun preocupazion la assence di percors di educazion afetive e sessuâl
obligatoris a nivel nazionâl e l’innomenât DDL Valditara sul consens informât, che al limite
ancjemò di plui l’acès a chescj percors, subordenantlu a un consens scrit des fameis e
fasint deventâ disomogjenis e framentâts i percors formatîfs.
O domandìn che tal Plan Trienâl de Ufierte Formative (PTOF) di ogni scuele publiche e
sedi garantide une educazion vere ae afetivitât, ae sessualitât, al consens e aes
diferencis, metude in vore in cunvigne cui sogjets competents, e une formazion continue e
cualificade pal personâl scolastic, educatîf e aministratîf.
O ricuardìn ae Regjon F-VG che il progjet “A scuele par cognossisi” al è stât l’esempli
perfet di cheste buine pratiche: o pretindìn che al torni a jessi finanziât, cun plui fonts e
une difusion capilâr sul teritori. O rivendichìn la istituzion di un servizi psicologjic scolastic
struturât e permanent che al ledi plui in lâ de logjiche dai sportei saltuaris di cumò,
garantint une presince fisse tal organic di ogni istitût.
Sex work is work
Il sex work (lavôr sessuâl) al à di jessi decriminalizât e a coventin politichis di contrast al
stigme. O domandìn che e vegni riviodude in maniere struturâl la Leç Merlin: o denunziìn
come che il reât di “favoriment” vuê al sedi doprât par criminalizâ la autoorganizazion, i
jutoris mutuâls e la condivision di spazis sigûrs, taiant fûr lis sex workers e disprivantlis de
pussibilitât di gjestî il lôr lavôr in autonomie e sigurece.
Al è necessari garantî aes sex workers migrantis l’acès ae justizie e ai documents,
gjavantlis vie de clandestinitât. Al è fondamentâl ricognossi ancje a chestis personis il dirit

ae gjenitorialitât, e garantî i servizis sanitaris di prevenzion e gjestion des malatiis che si
trasmetin par vie sessuâl, di PrEP e pes terapiis ormonâls.
Alfin, o evidenzin trop che l’inseriment lavoratîf des personis trans* sedi ancjemò
caraterizât di discriminazions fuartis: il câs di Cloe Bianco al è un esempli lancurôs. Par
prionte, a patî lis consecuencis piês a son lis personis trans* sex worker e sex worker
migrantis, che a si cjatin a frontâ ulteriôrs grâts di margjinalizazion.
Drets al pont
O rivendichìn un cuadri legjislatîf e istituzionâl che al garantissi plene paritât, dignitât,
tutele e autodeterminazion des personis LGBTQIAPK+ e o domandìn di cjapâ iniziativis
concretis cuintri de violence e de discriminazion. O condanìn lis cussì clamadis “terapiis
riparativis” o di conversion e o domandìn la lôr proibizion esplicite.
O pretindìn un Stât dal dut laic, la rimozion dai simbui religjôs dai spazis publics e une
riforme dal 8×1000 che e assegni lis cuotis no palesadis dome al Stât, a pro dai servizis
publics.
I dirits a àn di cjatâ aplicazion concrete in ducj i ambits istituzionâi. Tal sisteme penitenziari
chest al vûl dî rispietâ la identitât di gjenar, garantî l’acès ae salût e al supuart psicologjic,
meti in vore percors reâi di reinseriment, formazion obligatorie dal personâl e prevenzion
des discriminazions.
La violence di gjenar e à di jessi frontade cun politichis struturâls: educazion, prevenzion e
trasformazion culturâl. O domandìn di sostignî lis vitimis e lis realtâts teritoriâls, la racuelte
di dâts acessibii e la plene paritât di acès a lavôr, sanitât e istruzion, parant indaûr
cualsisei imposizion eteropatriarcjâl.
O denunzìn lis contradizions dal sisteme di acet talian, che al ostacole il ricognossiment da
la protezion internazionâl e al espon lis personis LGBTQIAPK+ a rimpatris sfuarçâts e al
sfrutament. O domandìn servizis di acet specializâts, il rispiet da lis liniis vuide
internazionâls intes Comissions Teritoriâls, struturis e fonts adats par l’acet difondût sul
teritori e la libertât operative pes ONG tai socors. O volìn che a vegnin abolîts i CPR, a
scomençâ di chel di Gardiscje, e che e vegni tornade la dignitât aes personis presoniris.
O domandìn di tutelâ lis personis LGBTQIAPK+ vielis, chês neurodivergjentis e cun
disabilitâts, traviers la acessibilitât universâl e i servizis iuscj. O difindìn il dirit ae afetivitât
e ae sessualitât, cuintri di cualsisei forme di infantilizazion.
O afermìn il dirit ae autodeterminazion pe fin de vite, domandant l’acès al suicidi assistût,
cence acaniment terapeutic ni percors judiziaris imponûts.
Puar chel che nus tocje!
O ricognossìn che lis diferentis formis di opression e violence di gjenar a vegnin fûr da la
stesse culture patriarcjâl e maschiliste. O pretindìn il rinfuarciment e il finanziament stabil
de rêt dai centris antiviolence, des cjasis ripâr e dai servizis antidiscriminazion, cun
atenzion particolâr aes esigjencis de comunitât LGBTQIAPK+. Al è fondamentâl ancje

garantî une formazion adate aes figuris istituzionâls cjapadis dentri te gjestion dai câs di
violence, par che sedin in stât di intervignî cun competence, sensibilitât e rispiet.
Cambial il clime? Che al cambi il sisteme
O pretindìn azions concretis e politichis valevulis par dâi cuintri al cambiament climatic de
bande di istituzions e impresis di cualsisei nivel. Al è necessari orientâ la transizion
ecologjiche daûr dal principi da la just transition, ven a stâi integrant i obietîfs ambientâi cu
la justizie sociâl.
Liberis/ars dutis/cj
O ricognossìn tant che pârs ducj i vivents e si unìn aes batais des associazions par realizâ
un Pride plui pussibil vegan, antispecist e inclusîf. O sin cuintri di ogni forme di
impresonament, torture, disfrutament, consum e stermini animâl. O refudìn il privileç che al
presum la superioritât assolude de specie umane rispiet ai altris animâi e a dute la nature.
La resistence no si ferme
F-VG Pride al condane e al repudie la vuere tant che strument di opression. O sostignìn la
cause dal popul palestinês e il so dirit a autodeterminâsi e o condanìn il gjenocidi cometût
de entitât sioniste. O domandìn ae Regjon F-VG, aes Universitâts e ai ents locâi di rompi
ducj i contrats e lis colaborazions cu lis istituzions e lis aziendis leadis a la entitât sioniste.
O calcolìn necessarie la condane di cualsisei forme di vuere e violence imperialiste,
cjapant chê iraniane tant che ultin esempli. Denunzìn cun fermece la repression cressinte
de dissidence e l’ûs sproporzionât de fuarce (come che al è sucedût a Udin ai 14 di Otubar
dal 2025, ma ancje a Turin e Milan). O pretindìn la introduzion dai codiçs identificatîfs pes
fuarcis di polizie, la fin de militarizazion dal spazi public e la eliminazion di cualsisei
pratiche burocratiche che a ostacoli il dirit di manifestâ.